賭徒心態要不得
[2010-06-23]
網友失敗投機者留言話，自己試過曾經幾張期指，幾球牛熊過夜，一晚輸十個（10萬），未到30歲負債已接近100萬，好迷失。
我後來追問「失敗投機者」，究竟佢欠100萬和炒股有無關，佢咁回應︰「陸Sir，100萬是之前欠下的，都是炒股、炒期指、炒期權輸的，而最後剩下20-30萬，諗住可以慢慢翻身，不過就愈踩愈深。」
聽完全套，可以總結「失敗投機者」的個案，佢合共借咗100萬，之前炒輸咗70、80萬，剩番20、30萬，過去半年做「掛名經紀」輸埋，即係輸清100萬，不知何去何從。
停一停 諗一諗
人作為靈長類動物之冠，論攻擊力不如獅子、老虎，論速度不如獵豹，憑甚麼稱霸地球？主要係用腦，靠學習。我看過一輯紀錄片，講一隻猩猩如何慢慢學識用石頭打開椰子來吃，猩猩都OK，可見智力更高的人類，學習能力更高。對，就是高階思維和學習能力，令人類可以稱王稱霸。那麼「失敗投機者」你又從自己的失敗經驗中，學到甚麼呢？
你總結唔到，我替你總結，第一，你未具備投機贏錢的能力，但有好清楚的失敗往績。好似賭馬睇隻馬過往賽績，我睇你啲炒股賽績，都會估你賭落去多數輸。直至你發現自己輸過的原因，並經清楚測試你的總結是正確之前，最好方法是唔好再賭。停一停，諗一諗。
第二，我靠估你輸錢的原因，和好多散戶炒股、炒衍生工具輸錢一樣，係同大朋友對賭，輸畀佢哋。賭衍生工具是一個「零和遊戲」，你贏，就是對手輸，你輸，對手就贏，而你賭衍生工具，對手並不是隨機分布的其他散戶，而係各式各樣的大朋友。
炒期指，散戶好多時是和本地和外資大戶對賭，試想一間大行自己炒作都可能買賣幾千張期指，要搵散戶做對手，佢想揸，自然造到個市有咁衰得咁衰，佢可以借現貨大手沽空，然後買期指，插到底反手撈番現貨，坐待收成。反之佢要沽亦都係一樣，造到大市好好等你接佢貨。至於期權和窩輪，你去買，就係同沽家對賭，方向有三個，升、跌、唔郁，你買升，開跌或開唔郁，都係你輸。
賭贏大戶不容易
第三，要賭贏大戶絕不容易，要在鱷口偷金賺小小使費已經好難，我估你炒作的方法根本係錯，好多時甚至不是炒作，係賭博，你話「因試過曾經幾張期指，幾球牛熊過夜，一晚輸十個（10萬）」。炒咁大過夜，好多時和賭大細無乜分別，炒股過夜，最大變數係當天晚上美股表現，美股升一日跌一日，邊個咁有把握估到美股點走，你揸咁大過夜，可以一晚發達，也可以一晚輸清，同賭錢無大分別。
第四，後生大把機會。你話做掛名經紀自己炒「到現在為止，結果係失敗的，但如果轉第二行，都唔知何年何月有機會還清100萬欠債。」呢個世界無得一步登天，有正確方法，慢慢累積可以修成正果，方法唔正確，只會愈行愈遠。
第五，肯博實有出路。戒掉壞習慣，增加正收入，係累積財富之路，我唔知你有乜其他壞習慣，例如賭波，如果你賭一次2000元，買3次中一次淨輸兩次，一年隨時唔見10萬、8萬，戒咗佢已經有唔少錢還債，打兩份工又多啲錢還債，花三幾年還清債務，重新上路。
陸羽仁 |
发表于 2010-6-27 17:39
|